Гьаргала дурарухъи,
Нушала ралкӀа Хамис
Ахъли рургъули сари
ХӀярличибси дагъалис:
– Агь, хӀуни наб барибси,
Дила гӀяргӀнала пачяхӀ!
Бухънабаили хьалли,
Агарлигу хӀела яхӀ!
Рухънала хъутуръала
Дагъалира иргъулри:
– Мурталра гаприкӀудгу,
Сен ишбархӀи рургъулри?
Савлиличирад набчи
Илкьяйда рехӀризурли,
Алгъай кьяшличирад хӀу
АхӀенрив аризурли?
– ХӀу гӀуррара гӀяйибта,
Марли, набчи биркьулрив?
Илдигъунта биркьахъес
ХӀу балтара бикӀулрив?
Гьанбиркуру, гьалабра
ХӀу буцили битили?
ХӀела дуркьа уюнти
Саригу наб детӀили.
ХӀуни гӀугӀу хӀебелчӀи,
Абухъи савли берхӀи,
Ну гӀурра дехӀибайчи
Кьанриубра ишбархӀи!
– Ит ярга гӀугӀу белчӀес
Буири дила тӀама.
БекӀлил гӀяйиб агаркъи,
БелтӀунри дила кьама.
– Бура, хӀуни ишбархӀи
ГӀугӀу сен хӀебелчӀунри?!
ДукаркӀули саб набчи
Лебилра унра хьунри.
– Муэрлизиб буцили,
Ну гурдали аркулри.
ГӀугӀу белчӀес кьалли наб
ХӀекьли цӀакьли дигулри.
Ласбарили дила сурс
Ил мялгӀунни буцилри:
МухӀли гьаргли сабкъира,
ТӀама чекабуцилри.
– Гьанна нуни буруси
ХӀуни чӀумали аргъа:
Мургьила биадлира,
ХӀейги хӀугъуна дагъа!
– Ит муэр чебаила
Лебалрагу руржули.
ХӀуни барибси бунагь
Ралад набчи буршули!
ХӀела бунагьуни наб
АхӀенрагу дигули.
Гурдали арбукасли,
Рууду хӀерулгули?
ХӀу рулгахъес тӀатӀиэс
СягӀят мага сабрав ну?
ГӀядусла дагъалира
БучӀули сабгу гӀугӀу…
– Ягъари, гьиммабуркӀуд,
Дила гӀягӀнала талхъан.
ГӀядусла дагъа хӀейги,
Биаллира верхӀна хан!
* * *
ВегӀличирти гӀяйибти
УрхӀличи чедуршуси
Адамти-ургав вирар
Ил хухучи мешуси.
