Ца бархӀи цаличи ца
ГьимдукӀилри кӀелра кӀентӀ.
Илда дирул пишначи
ДукаркӀулри бухъна тӀентӀ:
– «ХӀуша кӀел бузи сари»
БикӀусири ну гьалаб,
Я цали итилличи
ГьалахӀебирхьу тӀалаб.
Къянкъличи кабиили,
ХӀушачи хӀербикӀулра,
КӀилалра уюнтачи
Бамсайчи дукаркӀулра.
– Селис хӀу жалбикӀуда,
Ну сабрагу халаси!
Мурт-биалра илгъуна
Бетаруси баласи,–
Супелра чихьбуцили,
Бургъулри чедибси кӀентӀ.
Илала шикьатӀайзиб
Чебиур гӀяжаиб пентӀ.
– ЖалбикӀуси хӀу сабри,
ХӀекьли къугъабиубли!
Гьалаб чехӀебаири
ХӀу илцад хамбиубли.
Супел хӀечиб биалра,
МуцӀур сабгу дила уб.
Гьанна бикайчи дила
ХӀечил жалти хӀедиуб.
– Ну чедиб биънилира
Бурулигу чи сабрал.
Сен мехӀурта бугьуда,
АхӀенкъира хӀу абдал?
– Кьякьла багьа убзали
АхӀену лябкьяхъуси?
Нура хӀугъуна биъни
Секьяйда иргъахъуси?
ЖалдикӀулри кӀелра кӀентӀ,
Дамсурли кадикайчи.
Къянкъличиб лехӀлири тӀентӀ,
Жалчиби къайдикайчи.
– Сепайда хӀуша кӀелра
КьацӀдуцахъес нушази!
Балахъира илхӀели
Чихъалирил хӀушази! –
Гъяждиубли кьярждухъун
ГьимдукӀиб цӀуба цулби.
КӀунтӀубала шикьличи
Дамкьурли сари хӀулби.
– Сегъуна бируса ну
ХӀуша кӀелра агарли?
Ца дукӀлизирра хӀуша,
Рахли, аргъес дигалли, –
Гьандуцес хӀебиубли,
Хъутурдяхъиб мухӀлили,
КӀелра кӀентӀ цаличи ца
БиругӀеб гъяждирули.
* * *
ДукӀлизи дабгиб кӀел унц
ДугӀли сар жалдикӀути.
«Ца кьяшла дабригъунти»,–
Илдас бирар бикӀути.
